يمكن
لأني شبيه النظرة ف عيونك
لأبعد ما يكون
: شارد
تناديني الملايكة في مناماتك
و انا حامل مقاماتك وأضرحتك
و متلفَع بشال الأوليا الأخضر
بلون برسيمك النوّار
تناديني و انا دوّار
بحملي في صحاريكي ،
وانا غرقان ف مية نيلك الأسمر ،
و حافي في حواريكي
حكيم .. مجنون
يمكن
لأني شبيه النظرة ف عيونك
لأبعد مايكون
: فارد
جناحاتي على مدَ البصر و الشوف
عني الحجاب مكشوف
جميع الأنبيا فيكي .. أنا
كل الفصول
و الشهور
و أيام السنة
تغريدة العصفور ف عين النور
و دبلان سوسنة
على غصنك
أنا منك
و مجهولك لعيني صار .. معروف
و ياما قلت لك عن بكرة و اللي جايّ
أنا الميت على أرضك
ف قلبك حيّ
و هاجراني ف وقت الأزمة و العوزة
و انا قلبي بالعشق ِلك .. مسكون
يمكن
لأني شبيه النظرة ف عيونك
لأبعد ما يكون
لأني شبيه النظرة ف عيونك
لأبعد ما يكون
: مارد
عظيم الشكل و المنظر
عجيب الفعل
أسطورة
جميع الناس على أرضك بتشبه لي
ملامحهم
ملامح وشي بالمللّي
و انا الحاوي لكل تاريخك الماضي
أنا نصرك
أنا اللي منهزم بيكي
حروبي صحيح على الفاضي
لان عذابي بإيديكي
لكني آمنت بإني شعبك الواحد
أنا الشبعان
و انا العطشان
و انا المتغطي و العريان
و انا الغلبان
.. و انا الفرعون
يمكن
لأني شبيه النظرة ف عيونك
لأبعد ما يكون
هناك تعليق واحد:
روعه روعه روعه
تحفه بجد حسيت انى بقراء حاجه لجمال بخيت دام لنا كلامك الاكثر من رائع وفى انتظار المزيد تقبل تحياتى
إرسال تعليق